ශ්රී ලංකාවේ ආර්ථිකය ප්රකෘතිමත් කිරීම සඳහා ලබාදෙන සහයෝගය අඛණ්ඩව සපයන බව ජාත්යන්තර මූල්ය අරමුදල (IMF) යළිත් තහවුරු කර ඇත. ඊයේ (14) පැවැති මාධ්ය හමුවකදී අදහස් දැක්වූ එහි සන්නිවේදන අධ්යක්ෂ ජූලි කොසැක් මහත්මිය සඳහන් කළේ, විවිධ අභියෝග මධ්යයේ වුවද ශ්රී ලංකාව පෙන්වන ආර්ථික ස්ථාවරත්වය සුවිශේෂී මට්ටමක පවතින බවයි. විශේෂයෙන්ම රජය විසින් ක්රියාත්මක කරනු ලබන ප්රතිසංස්කරණ වැඩසටහන මේ වන විට සාධනීය ප්රතිඵල අත්කර දෙමින් පවතින බව ඇය පෙන්වා දුන්නාය.මෑතකාලීනව මෙරට ආර්ථිකයට එල්ල වූ ප්රබල බලපෑම් දෙකක් පිළිබඳව ද මෙහිදී අවධානය යොමු කෙරිණි. දේශීය වශයෙන් ආර්ථික ක්රියාකාරකම්වලට බාධා පැමිණවූ “දිට්වා” සුළි කුණාටු තත්ත්වය සහ මැද පෙරදිග කලාපයේ පවතින යුදමය වාතාවරණය හේතුවෙන් මතු වූ අහිතකර බලපෑම් හමුවේ වුවද, ශ්රී ලංකාව තම ප්රතිසංස්කරණ මාවතේ ස්ථාවරව ගමන් කිරීම IMF හි පැසසුමට ලක් විය. බාහිර හා අභ්යන්තර කම්පන හමුවේ ආර්ථිකය කළමනාකරණය කරගැනීමට බලධාරීන් දක්වන කැපවීම මෙහිදී විශේෂයෙන් ඇගයීමට ලක් විය.දැනට ක්රියාත්මක වන වැඩසටහන යටතේ ශ්රී ලංකාවේ ආර්ථික කාර්යසාධනය ක්රමයෙන් වර්ධනය වෙමින් පවතින බව නිරීක්ෂණය වන බව ද මූල්ය අරමුදල පවසයි. ඉදිරියේදීත් මෙම ප්රගතිය නොවෙනස්ව පවත්වාගෙන යාම සඳහා අවශ්ය තාක්ෂණික හා මූල්යමය දායකත්වය ලබාදීමට ජාත්යන්තර මූල්ය අරමුදල සූදානමින් සිටී. මෙම සහතිකයත් සමඟ ඉදිරි ආර්ථික ඉලක්ක සපුරා ගැනීම සඳහා ශ්රී ලංකාවට ජාත්යන්තර වශයෙන් පවතින විශ්වාසය තවදුරටත් තහවුරු වී තිබේ.
IMF සහාය නොවෙනස්ව ශ්රී ලංකාවට
