Jaffna Kings කණ්ඩායමේ හිමිකරු ක්රීඩා වැරදි වැළැක්වීමේ විශේෂ විමර්ශන ඒකකය විසින් අත්අඩංගුවට ගෙන ඇති බවට මාධ්යවල පළවූ වාර්තා පිළිබඳව අවධානය යොමු වී ඇතැයි ශ්රී ලංකා ක්රිකට් ආයතනය නිවේදනය කරයි. මෙම සිද්ධිය සම්බන්ධයෙන් කිසියම් විමර්ශනයක් සඳහා සහාය අවශ්ය වුවහොත්, ලංකා ප්රිමියර් ලීග් (LPL) 2026 තරගාවලිය සමඟ එක්ව ඊට පූර්ණ සහයෝගය ලබා දෙන බව ශ්රී ලංකා ක්රිකට් ආයතනය වැඩිදුරටත් සඳහන් කරයි. ලංකා ප්රිමියර් ලීග් තරගාවලියේ පාලක මණ්ඩලය ලෙස, තරගාවලියේ අඛණ්ඩතාව ආරක්ෂා කිරීමට තමන් දැඩි කැපවීමකින් කටයුතු කරන බවත්, තරගාවලිය හා සම්බන්ධ කිසිදු පාර්ශ්වයකින් සිදුවන දූෂණ, අනිසි ක්රියා හෝ අසාධාරණ ක්රීඩා පිළිවෙත් කිසිසේත් නොඉවසන බවත් ඔවුහු අවධාරණය කරති. අද සවස කොළඹ එස්.එස්.සී (SSC) ක්රීඩාංගණයේදී ආරම්භ වීමට නියමිත ලංකා ප්රිමියර් ලීග් 2026 තරගාවලිය කිසිදු බාධාවකින් තොරව සැලසුම් කළ පරිදිම පැවැත්වෙන බවත්, ඉහළම සදාචාරාත්මක හා අඛණ්ඩතා ප්රමිතීන්ට අනුකූලව තරගාවලිය පැවැත්වීම සඳහා සියලු පියවර ගෙන ඇති බවත් ශ්රී ලංකා ක්රිකට් ආයතනය නිවේදනය කරයි. තරගාවලියට පෙර දූෂණ විරෝධී රාමුව ශක්තිමත් කිරීම සඳහා ශ්රී ලංකා ක්රිකට් ආයතනයේ දූෂණ විරෝධී ඒකකය විශේෂ විමර්ශන ඒකකය සමඟ සමීපව කටයුතු කර ඇති අතර, තරගාවලිය පුරා විශේෂඥ සහාය සහ අධ්යාපනය ලබා දීම සඳහා ස්වාධීන දූෂණ විරෝධී සහ ක්රීඩා අඛණ්ඩතා සංවිධානයක් වන ‘Integrity Mentors’ ආයතනය ද සම්බන්ධ කරගෙන ඇත. දූෂණය සහ අනිසි ක්රියාවන් සම්බන්ධයෙන් ශ්රී ලංකා ක්රිකට් ආයතනය දරන්නේ ශුන්ය ඉවසීමේ ප්රතිපත්තියක් බවත්, ලංකා ප්රිමියර් ලීග් 2026 තරගාවලිය සාධාරණ, විනිවිදභාවයෙන් යුත් සහ විශ්වසනීය ලෙස පවත්වාගෙන යාම සඳහා අවශ්ය සියලු පියවර ගන්නා බවත් ඔවුහු තවදුරටත් පවසති.
Jaffna Kings කණ්ඩායමේ හිමිකරුගේ අත්අඩංගුවට ගැනීම සම්බන්ධයෙන් ශ්රී ලංකා ක්රිකට් ආයතනයෙන් ප්රකාශයක්
