ගෝලීය තෙල් මිල ඉහළ යාම හමුවේ ඉන්ධන සහනාධාරයක් ලබා දීමට රජයේ අවධානය

ගල්ෆ් කලාපයේ උද්ගතව ඇති නොසන්සුන්තාව හේතුවෙන් ගෝලීය වෙළඳපොලේ බොරතෙල් මිල සීඝ්‍රයෙන් ඉහළ යාම නිසා, මෙරට තුළ නැවතත් ඉන්ධන සහනාධාරයක් ලබා දීම පිළිබඳව රජය අවධානය යොමු කර තිබේ. ඉන්ධන මිල ඉහළ යාමෙන් ජනතාව මත පැටවෙන අමතර බර අවම කිරීම මෙම වැඩසටහනේ අරමුණයි. මීට පෙර අප්‍රේල් මාසයේ සිට මාස තුනක කාලයක් ක්‍රියාත්මක වූ සහනාධාර වැඩසටහන පසුගිය ජූනි මාසයේදී තාවකාලිකව අත්හිටුවනු ලැබීය.​ලංකා ඛනිජ තෙල් නීතිගත සංස්ථාව (CPC) මෙම නව යෝජනාව ජනාධිපතිවරයා වෙත ඉදිරිපත් කිරීමට සූදානම් වන අතර, එය ක්‍රියාත්මක වුවහොත් දැනට පවතින සිල්ලර මිලෙහි වෙනසක් නොකර ඉතිරි පිරිවැය රජය විසින් දරාගැනීමට නියමිතය. පසුගිය වකවානුවේදී ඩීසල් ලීටරයකට රුපියල් 100ක් සහ පෙට්‍රල් ලීටරයකට රුපියල් 20ක් වශයෙන් සහනාධාරයක් ලබා දීමට රුපියල් බිලියන 57ක් වෙන් කර තිබුණි.​පසුගිය සතියේ පමණක් බොරතෙල් මිල 14%කට වඩා ඉහළ යාම බරපතළ තත්ත්වයක් වුවද, දේශීය ඉන්ධන සැපයුම ස්ථාවර කර ගැනීමට නව පියවර කිහිපයක් ගෙන ඇත. රුසියානු සමාගම් දෙකක් ශ්‍රී ලංකාවට ඉන්ධන සැපයීම සඳහා ලියාපදිංචි වී ඇති අතර, එමගින් වෙළඳපොළ තුළ තරඟකාරිත්වයක් ඇති වී දේශීය ඉන්ධන මිල ස්ථාවරව තබා ගැනීමට හැකිවනු ඇතැයි විශේෂඥයින් විශ්වාසය පළ කරයි.