රජයේ මූල්ය පාලනයේ පවතින දුර්වලතා හේතුවෙන් අහිමි වූ බව කියන ඩොලර් ලක්ෂ 25ක මුදල සම්බන්ධයෙන් රටට සත්ය හෙළි කරන ලෙස විපක්ෂ නායක සජිත් ප්රේමදාස මහතා රජයට අභියෝග කරයි. කුරුණෑගල ප්රදේශයේ පැවති ආගමික උත්සවයකින් අනතුරුව මාධ්ය වෙත අදහස් දක්වමින් ඔහු පෙන්වා දුන්නේ, මෙම මූල්ය අර්බුදය සම්බන්ධයෙන් මුදල් අමාත්යාංශ ලේකම්වරයා සහ නියෝජ්ය මුදල් අමාත්යවරයා පරස්පර ප්රකාශ නිකුත් කරන බවයි. විශේෂයෙන්ම ඕස්ට්රේලියානු පාර්ශවය සමඟ පැවති ගනුදෙනුවලදී සිදුවූ මෙම වංචාවට අමතරව, ඉන්දියාව සමඟ කළ ගනුදෙනුවකදී ද මෙවැනිම අලාභයක් සිදුව ඇත්දැයි රජය වහාම රටට පැහැදිලි කළ යුතු බව ඔහු අවධාරණය කළේය.මෙම මූල්ය වංචාව පිළිබඳ තොරතුරු ජනවාරි මාසයේදී අනාවරණය වී තිබියදීත්, ඒ පිළිබඳ පරීක්ෂණ පැවැත්වීමට මාර්තු මාසය වන තෙක් කල්මැරීම පිටුපස ඇති රහස්යභාවය විපක්ෂ නායකවරයා මෙහිදී ප්රශ්න කළේය. පාර්ලිමේන්තුව පවා දැනුවත් නොකර මෙතරම් දැවැන්ත මූල්ය වංචාවක් වසන් කරගෙන සිටීම බරපතල තත්ත්වයක් බවත්, මේ හරහා වත්මන් පාලනයේ අකාර්යක්ෂමතාවය මැනවින් ප්රදර්ශනය වන බවත් ඔහු පැවසීය. මූල්ය අමාත්යාංශය වැනි තීරණාත්මක ආයතනයක සයිබර් ආරක්ෂාව තහවුරු කර ගැනීමට නොහැකි පාලනයකට රටේ පොදු ජනතාවගේ ආරක්ෂාව සහතික කළ හැකිද යන්න පිළිබඳව ඔහු සැක පළ කළේය.ජාත්යන්තර ආයෝජකයින්ගේ විශ්වාසය දිනා ගැනීමට නම් මෙවැනි වංචා පිළිබඳව ස්වාධීන හා විනිවිදභාවයකින් යුත් පරීක්ෂණයක් අවශ්ය බව විපක්ෂ නායකවරයා මෙහිදී පෙන්වා දුන්නේය. චෝදනා එල්ල වී ඇති ආයතනවල නිලධාරීන්ම යොදාගෙන පරීක්ෂණ පැවැත්වීම විහිළුවක් බවත්, වහාම ජනාධිපතිවරයා මැදිහත් වී මේ පිළිබඳ විධිමත් පරීක්ෂණ සභාවක් පත් කළ යුතු බවත් ඔහු ඉල්ලා සිටියේය. ශ්රී ලංකාව වැනි ණය ප්රතිව්යුහගතකරණය කරන රටක මෙවැනි මූල්ය වංචා සිදුවීම ජාත්යන්තර වශයෙන් රටට අහිතකර පණිවිඩයක් නිකුත් කරන බවත්, “සුහුරු පාලනයක්” වෙනුවට අද ක්රියාත්මක වන්නේ අකාර්යක්ෂම පාලනයක් බවත් සජිත් ප්රේමදාස මහතා වැඩිදුරටත් සඳහන් කළේය.
ඩොලර් ලක්ෂ 25ක සයිබර් මංකොල්ලය: රජයේ නිහඬතාවය හමුවේ විපක්ෂ නායකයාගෙන් දැඩි ප්රශ්න
