ශ්රී ලංකා පදනම් ආයතනයේදී අද (12) පැවැති “මගෙන් මහපොළට, මහපොළෙන් දරුවන්ට” ජාතික වැඩසටහනට එක්වෙමින්, මෙරට උසස් අධ්යාපන ක්ෂේත්රයේ විප්ලවීය වෙනසක් සිදුකිරීම අග්රාමාත්ය හරිනි අමරසූරියගේ ප්රධානත්වයෙන් ආරම්භ විය. එහිදී විශේෂිතම පියවරක් ලෙස, විශ්වවිද්යාල සිසුන්ගේ ආර්ථික පීඩනය අවම කිරීම වෙනුවෙන් මහපොළ ශිෂ්යත්ව දීමනාව රුපියල් 10,000 දක්වා වැඩිකිරීමට රජය ගත් තීරණය නිල වශයෙන් ප්රකාශයට පත් කෙරිණි. මීට අමතරව, ආපදා තත්ත්වයන් හේතුවෙන් පීඩාවට පත් වූ සිසුන් වෙනුවෙන් විශේෂ මූල්ය ආධාර පිරිනැමීම ද මෙහිදී සිදුවිය.මූල්යමය ආධාරයකට පමණක් සීමා නොවී, වෘත්තීය ලෝකය ජයගත හැකි පුළුල් දැක්මක් සහිත පරපුරක් නිර්මාණය කිරීම මෙහි ප්රමුඛ අරමුණයි. ඒ වෙනුවෙන් මහපොළ ශිෂ්යත්වලාභීන්ගේ ‘ආදි විද්යාර්ථි වෙබ් ද්වාරය’ (Alumni Web Portal) විවෘත කිරීම අග්රාමාත්යවරිය අතින් සිදු විය. මෙමගින් ලොව පුරා විසිරී සිටින මහපොළ ප්රතිලාභීන් එකම ජාලයකට සම්බන්ධ කරමින්, වත්මන් ශිෂ්ය ප්රජාවට වෘත්තීය මාර්ගෝපදේශනය, රැකියා අවස්ථා සහ ප්රායෝගික පුහුණුව ලබාදීමට ශක්තිමත් පදනමක් සැකසෙනු ඇත.මෙහිදී අදහස් දැක්වූ අග්රාමාත්යවරිය අවධාරණය කළේ, රජය බලයට පත්වීමෙන් පසු මහපොළ භාරකාර අරමුදලේ පරිපාලන කටයුතු වඩාත් කාර්යක්ෂම කරමින් ශිෂ්යයන්ට හිමි සහන නිසි වේලාවට ලබාදීමට පියවර ගෙන ඇති බවයි. අධ්යාපන අවස්ථා පුළුල් කිරීම යනු හුදෙක් උපාධි ලබාදීම පමණක් නොව, ගෝලීය මට්ටමේ වෘත්තීයභාවයකින් යුතු ශිෂ්ය පිරිසක් බිහිකිරීම බව ඇය පෙන්වා දුන්නාය. අද දින දියත් කළ වෙබ් ද්වාරය එම අරමුණ කරා යන ගමනේ තීරණාත්මක හැරවුම් ලක්ෂ්යයකි.ශිෂ්යත්වයක් යනු පෞද්ගලික ජයග්රහණයක් පමණක් නොව, එය රට වෙනුවෙන් ඉටුකළ යුතු වගකීමක් බවත් අගමැතිනිය සිහිපත් කළාය. තම අධ්යාපනය හරහා පවුලට මෙන්ම සමස්ත රටටම යහපත් බලපෑමක් කිරීමට සිසුන් උත්සුක විය යුතු බව ඇය ප්රකාශ කළාය. උසස් අධ්යාපනයට ඇති ප්රවේශය නවීකරණය කිරීම හරහා ශිෂ්ය ප්රජාව රටේ සංවර්ධන ක්රියාවලියේ සක්රීය කොටස්කරුවන් බවට පත්කිරීම රජයේ ස්ථාවර ප්රතිපත්තිය බව ද මෙහිදී වැඩිදුරටත් කියැවිණි.මෙම අවස්ථාවට වෙළඳ හා වාණිජ අමාත්ය වසන්ත සමරසිංහ, නියෝජ්ය අමාත්ය ආර්.එම්. ජයවර්ධන ඇතුළු අමාත්ය මණ්ඩල සාමාජිකයින්, විශ්වවිද්යාල ආචාර්යවරුන් සහ විශාල සිසුන් පිරිසක් සහභාගී වූහ. මහපොළ අරමුදලේ වපසරිය පුළුල් කරමින්, එය මූල්ය ප්රදානයකට එහා ගිය සිසුන්ගේ සමස්ත පෞරුෂ වර්ධනයට දායක වන ආයතනයක් බවට පත්කිරීමට මෙහිදී සියලු දෙනාගේ එකඟතාවය පළ විය.
අගමැතිනි හරිනිගෙන් මහපොළට නව පණක්: ශිෂ්යත්ව දීමනාව රු. 10,000 දක්වා ඉහළට
