චීනයේ සත්කාරකත්වයෙන් පැවැත්වෙන 6 වන ආසියානු වෙරළ ක්රීඩා තරගාවලියේදී කැපී පෙනෙන දස්කම් දැක්වූ ශ්රී ලංකා කණ්ඩායම සමස්ත පදක්කම් 6ක් දිනා ගැනීමට සමත් විය. මෙහිදී කාන්තා වෙරළ කබඩි කණ්ඩායම රිදී පදක්කම දිනාගත් අතර, ප්රබල ඉන්දීය කණ්ඩායම සමඟ පැවැති අවසන් මහා තරගයේදී ලකුණු 47-31ක් ලෙස අවාසනාවන්ත ලෙස පරාජය වීමට ඔවුන්ට සිදුවිය. කෙසේ වෙතත්, ශ්රී ලංකා පිරිමි කබඩි කණ්ඩායමද සිය දක්ෂතා ප්රදර්ශනය කරමින් තරගාවලියේ ලෝකඩ පදක්කමක් මෙරටට හිමිකර දීමට සමත් වූහ.මලල ක්රීඩා අංශයෙන්ද ශ්රී ලංකාවට පදක්කම් කිහිපයක් හිමිවූ අතර, දුර පැනීමේ ඉසව්ව නියෝජනය කළ ඉෂාරා සමන්මලී රිදී පදක්කමක් දිනා ගත්තාය. එම ඉසව්වෙන්ම ශෂිකලා ලංකාතිලක ලෝකඩ පදක්කම දිනාගත් අතර, පිරිමි දුර පැනීමේ ඉසව්වෙන් ජයත්ර සම්පත් ලෝකඩ පදක්කමකට හිමිකම් කීවේය. මීට අමතරව පිරිමි මීටර් 60 සහාය දිවීමේ කණ්ඩායමද ලෝකඩ පදක්කමක් දිනාගනිමින් මෙරට පදක්කම් සටහන තවදුරටත් ශක්තිමත් කළේය.මෙවර තරගාවලියේ සමස්ත පදක්කම් සටහනේ පෙරමුණ ගැනීමට සත්කාරක චීන කණ්ඩායම සමත්ව සිටින අතර, ශ්රී ලංකාව ලබාගත් මෙම ජයග්රහණ ජාත්යන්තර වෙරළ ක්රීඩා ක්ෂේත්රය තුළ මෙරට නාමය ඔසවා තැබීමට ඉවහල් විය. අපේ ක්රීඩක ක්රීඩිකාවන් දැක්වූ මෙම දස්කම් ඉදිරි ජාත්යන්තර තරගාවලි සඳහා විශාල උත්තේජනයක් වනු නිසැකය.
ආසියානු වෙරළ ක්රීඩා උළෙලේදී ශ්රී ලංකාවෙන් පදක්කම් 6ක අභිමානවත් දස්කම්
