ගණේමුල්ල සංජීව ඝාතනයට ආධාර අනුබල දීමේ චෝදනාව මත අත්අඩංගුවට ගත් නීතිඥ තමරා කුමාරි අබේරත්න මහත්මිය ලබන මැයි මස 7 වනදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අධිකරණය අද (27) නියෝග කළේය. අපරාධ පරීක්ෂණ දෙපාර්තමේන්තුව අධිකරණයට දන්වා සිටියේ අදාළ වෙඩික්කරුට නීතිඥයෙකු ලෙස පෙනී සිටීමට අවශ්ය ටයිපටිය සහ ව්යාජ හැඳුනුම්පත සකස් කර දී ඇත්තේ මෙම සැකකාරිය බවයි. මීට අමතරව, ඇය හරක් කටා වැනි ප්රබල අපරාධකරුවන්ට විදේශගත වීමට සහාය වීම සහ ඔවුන් සමඟ සමීප සබඳතා පැවැත්වීම සම්බන්ධයෙන් ද බරපතල චෝදනා එල්ල වී තිබේ.විමර්ශනවලදී හෙළි වූ තවත් සුවිශේෂී කරුණක් වන්නේ සැකකාරියගේ බැංකු ගිණුමක රුපියල් කෝටි 23ක අතිවිශාල මුදලක් සංසරණය වී තිබීමයි. සාමාන්ය වෘත්තීය සේවය හරහා මෙවැනි ධනයක් උපයාගත නොහැකි බව ඇයගේ කාර්යාල සේවකයන්ගෙන් කළ ප්රශ්න කිරීම්වලදී තහවුරු වී ඇත. එමෙන්ම, ව්යාජ උපන් වර්ෂයක් ඇතුළත් හැඳුනුම්පතක් භාවිත කරමින් බැංකු ගිණුම් 7ක් පවත්වාගෙන යමින් ඇය රහසිගත මූල්ය ගනුදෙනුවල නිරත වී ඇති බව ද අධිකරණයේදී අනාවරණය විය.මෙම නඩුවේ 28 වන සැකකාරිය ලෙස නම් කර ඇති ඇයව බන්ධනාගාරය තුළ විශේෂ ආරක්ෂාවක් යටතේ රඳවා තැබීමට මහේස්ත්රාත්වරයා නියෝග කළේය. සැකකාර නීතිඥවරිය වෙනුවෙන් පෙනී සිටි නීතිඥයන් මෙම චෝදනා ප්රතික්ෂේප කළ ද, අපරාධ පරීක්ෂණ දෙපාර්තමේන්තුව ඉදිරිපත් කළ සාක්ෂි සලකා බලමින් ඇයව තවදුරටත් රක්ෂිත බන්ධනාගාරගත කෙරිණි. සිද්ධිය සම්බන්ධ වැඩිදුර විමර්ශන මැයි මස මුල් සතියේදී යළිත් අධිකරණය හමුවේ කැඳවීමට නියමිතය.
ගණේමුල්ල සංජීව ඝාතන කුමන්ත්රණයේ සැකකාර නීතිඥවරිය රක්ෂිත බන්ධනාගාරයට
