හිටපු ජනාධිපති ආර්යාව වන ශිරන්ති රාජපක්ෂ මහත්මියට අයත් කොළඹ ටොරින්ටන් ප්රදේශයේ පිහිටි දේපළක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විශේෂ පියවරක් ගෙන තිබේ. “සිරිලිය” ගිණුම සම්බන්ධ විමර්ශනවලට සමගාමීව, මෙම නිවස මිලදී ගැනීමට වැය කළ මුදල් උපයාගත් ආකාරය පිළිබඳව වහාම කරුණු පැහැදිලි කරන ලෙස ඇයට දැනුම් දී ඇත. එම පැහැදිලි කිරීම සිදු කරන තෙක් අදාළ දේපළෙහි හිමිකාරීත්වය වෙනත් පාර්ශවයකට පැවරීම ද තාවකාලිකව අත්හිටුවා තිබීම විශේෂත්වයකි.මෙම දේපළ නීති විරෝධී ලෙස උපයාගත් මුදල්වලින් මිලදී ගත් බවට සැක පළ කරන කොමිසම, ඒ පිළිබඳ නිසි තොරතුරු ලබා දීමට අපොහොසත් වුවහොත් අධිකරණමය ක්රියාමාර්ග හරහා දේපළ රාජසන්තක කිරීමට හෝ අත්හිටුවීමට කටයුතු කරන බව අවධාරණය කරයි. නිවස මිලදී ගත් ආකාරය පිළිබඳ විනිවිදභාවය තහවුරු කිරීම සඳහා මෙම රාජ්යතාන්ත්රික විමර්ශනය තවදුරටත් පුළුල් කර ඇති බව වාර්තා වේ.මේ අතර, හිටපු ජනාධිපති මහින්ද රාජපක්ෂ මහතා විසින් ඉදිරිපත් කරන ලද වත්කම් දිවුරුම් ප්රකාශය ද දෝෂ සහිත බව අල්ලස් කොමිසම පෙන්වා දී ඇත. නව දූෂණ විරෝධී පනත ප්රකාරව නිවැරදි තොරතුරු ඇතුළත් දිවුරුම් ප්රකාශයක් ලබා දීමට ඔහුට ලබා දී තිබූ කාලය ඉක්මවා ගියහොත්, එය තොරතුරු වසන් කිරීමක් ලෙස සලකා නීතිමය පියවර ගන්නා බව කොමිසම වැඩිදුරටත් සඳහන් කරයි.
ශිරන්ති රාජපක්ෂ මහත්මියගේ ටොරින්ටන් නිවස විකිණීම අත්හිටුවයි
