‘ඒහිපස්සිකෝ’ සාම පාගමනට නියෝජ්‍ය ඇමති කෞෂල්‍යාත් එක්වෙයි

පූජ්‍ය පඤ්ඤාකාර ස්වාමීන් වහන්සේගේ මූලිකත්වයෙන් ශ්‍රී ලංකාවෙන් ලොවටම සාමයේ පණිවිඩය රැගෙන යන ‘ඒහිපස්සිකෝ’ (Walk for Peace) ජාත්‍යන්තර සාම පාගමන අද (27) උදෑසන යක්කල ප්‍රදේශයෙන් යළිත් ගමන් ආරම්භ කළා. ඊයේ තෝලංගමුවෙන් ඇරඹි මෙම උතුම් පා ගමනට එක්වූ ජනමාධ්‍ය නියෝජ්‍ය අමාත්‍ය ආචාර්ය කෞෂල්‍යා ආරියරත්න මහත්මිය, ගමනේ යෙදෙන මහා සංඝරත්නයට සිය ගෞරවය පුද කරමින් අද දින ගමන් වාරයට සහභාගී වූවාය. දැඩි හිරු රශ්මිය මධ්‍යයේ වුවද දහස් සංඛ්‍යාත ජනකායක් පිරිවරාගත් මෙම පාද යාත්‍රාව මේ වන විට කැලණිය රජමහා විහාරස්ථානය කරා ළඟා වෙමින් පවතියි.​මහා සංඝරත්නයේ පාදවලට දැනෙන අධික මාර්ග උණුසුම අවම කරනු පිණිස මඟ දෙපස රැඳී සිටි සැදැහැවතුන් මාර්ගය පුරා කෙසෙල් කොළ එළමින් හා මල් අතුරමින් ගෞරව දැක්වීම කැපී පෙනෙන දසුනක් විය. බෞද්ධ ජනතාවට අමතරව අන්‍යාගමික නායකයින් සහ විවිධ ජාතීන්ට අයත් නියෝජිතයින් විශාල පිරිසක් මෙම සාම චාරිකාවට එක්ව සිටීම, ශ්‍රී ලංකාවේ පවතින ආගමික සහජීවනය සහ සාමකාමී සහජීවනය ලෝකය හමුවේ මැනවින් විදහා දක්වන්නකි.​මෙම වැඩසටහනේ මීළඟ අදියර හෙට (28) පෙරවරුවේ කැලණිය රජමහා විහාරස්ථානයේදී පාසල් හා විශ්වවිද්‍යාල සිසුන් සමඟ පැවැත්වෙන විශේෂ සාකච්ඡාවකින් ආරම්භ වීමට නියමිතයි. ඉන් අනතුරුව පා ගමන නිදහස් චතුරස්‍රය දක්වා ගමන් කරන අතර, හෙට පස්වරු 4.00 ට ගරු ජනාධිපති අනුර කුමාර දිසානායක මැතිතුමාගේ ප්‍රධානත්වයෙන් එහිදී උත්කර්ෂවත් රාජ්‍ය උත්සවයක් පැවැත්වේ. මෙහිදී ජනාධිපතිතුමා විසින් පඤ්ඤාකාර හිමියන් ඇතුළු නියෝජිත පිරිස වෙත ශ්‍රී මහා බෝධීන් වහන්සේගේ අංකුර පැළයක් නිල වශයෙන් භාර දීමට නියමිතව ඇත.​අවසන් අදියර ලෙස හෙට පස්වරු 5.30 ට නිදහස් චතුරස්‍රයෙන් යළි ඇරඹෙන පාද යාත්‍රාව, පස්වරු 7.00 ට කොළඹ ගංගාරාම විහාරස්ථානය වෙත ළඟා වීමෙන් පසු නිමාවට පත් වනු ඇත. මෙම සාමකාමී සත්කාරය සඳහා ජනාධිපති ලේකම් කාර්යාලය, ‘Clean Sri Lanka’ වැඩසටහන, බුද්ධශාසන හා සංස්කෘතික අමාත්‍යාංශය ඇතුළු රාජ්‍ය ආයතන රැසක් සමඟ ත්‍රිවිධ හමුදාව සහ පොලීසිය පූර්ණ රාජ්‍ය අනුග්‍රහය සහ ආරක්ෂාව සපයනු ලබයි.​දශක ගණනාවකට පසු ශ්‍රී ලංකාව කේන්ද්‍ර කරගනිමින් සංවිධානය වූ මෙම දැවැන්ත ජාත්‍යන්තර සාම ප්‍රයත්නය, කලාපීය වශයෙන් පමණක් නොව ගෝලීය වශයෙන් ද සාමය උදෙසා කෙරෙන ප්‍රබල බලපෑමක් වනු නිසැකය. සියලු ජාතීන් හා ආගම් එකම අරමුණක් වෙනුවෙන් පෙළගැසීම තුළින් මෙරට අනාගත සංවර්ධනයට හා සංහිඳියාවට නව ජවයක් එක්වන බව සංවිධායක මණ්ඩලය විශ්වාසය පළ කරයි.