මෙරට අධ්යාපන සහ කළමනාකරණ ක්ෂේත්රයේ ප්රමුඛ පෙළේ විද්වතෙකු වූ ශ්රී ලංකා විවෘත විශ්වවිද්යාලයේ කළමනාකරණ අධ්යයන පීඨයේ හිටපු පීඨාධිපති, ජ්යෙෂ්ඨ මහාචාර්ය නලින් අබේසේකර මහතා අභාවප්රාප්ත වී තිබේ. මිය යන විට 51 වන වියෙහි පසු වූ ඒ මහතා, ශාස්ත්රීය දැනුම සමාජගත කිරීමට මෙන්ම මානව හිතවාදී මෙහෙවරක් ඉටු කිරීමට මහත් කැපවීමකින් කටයුතු කළ පුද්ගලයෙකි. කොළඹ ආනන්ද විද්යාලයේ ආදි සිසුවෙකු වූ ඔහු, ශ්රී ජයවර්ධනපුර සහ කොළඹ විශ්වවිද්යාලවලින් සිය පශ්චාත් උපාධි හා ආචාර්ය උපාධිය සම්පූර්ණ කරමින්, වයස අවුරුදු 48 වැනි තරුණ වියේදීම ජ්යෙෂ්ඨ මහාචාර්ය ධුරයට පත්වීම විශේෂත්වයකි.ශාස්ත්රීය විෂයන් සරල බසින් ජනතාව අතරට ගෙන යාමට උනන්දු වූ මහාචාර්යවරයා, “අලෙවිකරණය සිංහලෙන්” වැනි කාලෝචිත කෘති සම්පාදනය කළ අතර එහි දෙමළ සංස්කරණය පසුගියදා යාපනය විශ්වවිද්යාලයේදී එළිදැක්විණි. හුදෙක් විෂය කරුණුවලට පමණක් සීමා නොවූ ඔහු, සිය බිරිඳ සමඟ එක්ව කවි එකතුවක් ප්රකාශයට පත් කරමින් සහ “කළමනාකරණයට විරාමයක්” වැනි වැඩසටහන් හරහා උපාධිධාරීන් තුළ කලාකාමීත්වය ඇති කිරීමට ද පියවර ගත්තේය. ශ්රී ජයවර්ධනපුර විශ්වවිද්යාලය විසින් පිරිනමනු ලබන “ප්රදීප ප්රණාම” සම්මානයෙන් පවා පිදුම් ලැබීමට ඔහුට හැකි වූයේ රටට ඉටු කළ අමිල මෙහෙවර නිසාමය.නිදහස් අධ්යාපනයේ සැබෑ උරුමක්කාරයෙකු ලෙසත්, බොහෝ දෙනා අතර “නලින් අයියා” යන ආදරණීය නාමයෙන් ප්රකටව සිටි ඒ මහතාගේ හදිසි නික්මයාම මෙරට විද්වත් ප්රජාවට පිරවිය නොහැකි අඩුවකි. අවසන් මොහොත දක්වාම මෙරට වෘත්තීය හා ශාස්ත්රීය ක්ෂේත්ර නගාසිටුවීමට ක්රියා කළ මහාචාර්ය අබේසේකර මහතාගේ දායකත්වය ශ්රී ලාංකීය අධ්යාපන පද්ධතිය තුළ නොමැකෙන සලකුණක් තබනු ඇත. රජයේ සහ පෞද්ගලික අංශයේ බොහෝ දෙනෙකුට ගුරුහරුකම් දුන් ඔහුගේ අභාවය සම්බන්ධයෙන් මේ වන විටත් විවිධ ක්ෂේත්ර නියෝජනය කරන පිරිස් සිය ශෝකය පළ කරමින් සිටිති.
මහාචාර්ය නලින් අබේසේකර මහතා අභාවප්රාප්ත වෙයි
