ඕස්ට්රේලියාවේ බ්රිස්බේන් නුවර QSAC ක්රීඩාංගණයේදී මෑතකදී නිමාවට පත් වූ ඕස්ට්රේලියානු ජාතික කනිෂ්ඨ මළල ක්රීඩා ශූරතාවලියේදී (National Junior Athletics) සුවිශේෂී දක්ෂතා දැක්වීමට ශ්රී ලාංකේය සම්භවයක් සහිත කෙවින් ද සිල්වා සමත් විය. 15 හැවිරිදි වියේ පසුවන කෙවින්, තමාට වඩා වයසින් වැඩි ක්රීඩකයින් සහභාගී වන වයස අවුරුදු 17න් පහළ කාණ්ඩය නියෝජනය කරමින් මීටර් 100 ඉසව්ව තත්ත්පර 10.75ක දක්ෂතාවයක් (PB) සමගින් ජයග්රහණය කරමින් රන් පදක්කම දිනා ගත්තේය. මීට අමතරව මීටර් 200 ඉසව්වෙන් ලෝකඩ පදක්කම (තත්ත්පර 21.53) සහ මීටර් 100×4 සහාය දිවීමේ ඉසව්වෙන් රන් පදක්කම ද තමා සතු කර ගැනීමට ඔහු සමත් විය.කෙවින්ගේ මෙම ජයග්රහණය හුදෙක් අහම්බයක් නොවන බව සනාථ වන්නේ 2025 වසරේ මෙල්බර්න් නුවර පැවති සමස්ත ඕස්ට්රේලියානු පාසල් මළල ක්රීඩා ශූරතාවලියේදී ද ඔහු දැක්වූ විශිෂ්ට දක්ෂතා හේතුවෙනි. එහිදී මීටර් 100, මීටර් 200 සහ මීටර් 100×4 සහාය දිවීමේ ඉසව් යන ත්රිත්වයෙන්ම රන් පදක්කම් දිනා ගනිමින් “රන් ත්රිත්වයක” හිමිකරුවෙකු වීමට ඔහුට හැකි විය. වසරින් වසර තම පෞද්ගලික හොඳම කාලය (PB) අභිබවා යමින් කෙවින් දක්වන මෙම ප්රගතිය ජාත්යන්තර අවධානයට ද ලක්ව තිබේ.ප්රවීණ පුහුණුකරු මයික් ඩොනාටෝ (Mike Donato) මහතා යටතේ පුහුණුව ලබන කෙවින්, ඕස්ට්රේලියානු මළල ක්රීඩා ක්ෂේත්රය තුළ ශ්රී ලාංකේය නාමය ඉහළින්ම සනිටුහන් කිරීමට සමත්ව ඇත. කෙටි දුර ධාවන ඉසව්වන්හි අනාගත බලාපොරොත්තුවක් ලෙස සැලකෙන මෙම යොවුන් ක්රීඩකයා, ඉදිරි ජාත්යන්තර තරගාවලි වලදී ද මීට වඩා ඉහළ දක්ෂතා දක්වනු ඇතැයි ක්රීඩා විචාරකයෝ අනාවැකි පළ කරති.
ඕස්ට්රේලියානු මළල ක්රීඩා පිටිය හොල්ලන ශ්රී ලාංකේය යොවුන් වේග රිද්මය: කෙවින් ද සිල්වාගෙන් රන් පදක්කම්
