රටේ පවතින ආර්ථික අර්බුදය හමුවේ ආණ්ඩුවේ විනිවිධභාවය බරපතළ ප්රශ්නාර්ථයක් වී ඇති බව පෙන්වා දෙන මුජිබර් රහුමාන් මහතා, මහා භාණ්ඩාගාරයේ සිදුවූ මුදල් සොරකම පිළිබඳව මෙතෙක් අපරාධ පරීක්ෂණ දෙපාර්තමේන්තුවට (CID) පැමිණිල්ලක් ඉදිරිපත් නොකිරීම ගැටලුසහගත බව අවධාරණය කරයි. ජාතික ලැයිස්තු මන්ත්රීවරයෙකු මුදල් අමාත්යාංශයේ ලේකම් ධුරයට පත්කිරීම හරහා රාජ්ය අංශයේ ස්වාධීනත්වය උල්ලංඝනය වී ඇති බැවින්, වහාම අදාළ ලේකම්වරයාව එම ධුරයෙන් ඉවත් කළ යුතු බව ඔහු ප්රකාශ කළේය. මෙම සොරකම සම්බන්ධයෙන් ආණ්ඩුව නිසි පියවරක් නොගන්නේ නම්, සමගි ජන බලවේගය මැදිහත් වී පරීක්ෂණ සඳහා CID වෙත යන බවත්, දූෂණය වසා ගැනීමට අධික බලය භාවිතා කිරීමේ උත්සාහයට එරෙහි වන බවත් මන්ත්රීවරයා වැඩිදුරටත් පැවසීය.එමෙන්ම බහලුම් සිද්ධිය සහ ගල් අඟුරු ගනුදෙනුව පිළිබඳව පත්කර ඇති කමිටුවල ස්වාධීනත්වය පිළිබඳව ද මෙහිදී දැඩිව ප්රශ්න කරන ලදී. ආණ්ඩුවට එරෙහිව දූෂණ චෝදනා එල්ල වන විට පැරණි සිදුවීම් කරළියට ගෙන ඒම ජනාධිපතිවරයාගේ පටු දේශපාලන උපක්රමයක් බවත්, දූෂිත ගල් අඟුරු ගනුදෙනුව සම්බන්ධයෙන් සාක්ෂි දීමට සජබය සූදානම් බවත් ඔහු සඳහන් කළේය. වර්තමාන පාලනය ජනතාව හමුවේ කළ ප්රකාශ බොරු බවට දැන් සනාථ වී ඇති අතර, තේරීම් කාරක සභා හරහා ප්රධාන මූල්ය අපරාධ යටපත් කිරීමට දරන උත්සාහය පරාජය කළ යුතු බව මන්ත්රීවරයා අවධාරණය කළේය.
මහා භාණ්ඩාගාරයේ සිදුවූ මූල්ය මංකොල්ලය වසන් කිරීමට ආණ්ඩුව දරන උත්සාහය හෙළිවේ: සජබයෙන් දැඩි විරෝධයක්
