ශ්රී ලංකාවේ ආර්ථික වර්ධනය තිරසාර මට්ටමකට ඔසවා තැබීම සඳහා වැටුප් රහිත රැකවරණ සේවාවන් (Unpaid care work) නිසි ලෙස ඇගයීමට ලක් කළ යුතු බව අග්රාමාත්ය හරිනි අමරසූරිය මෙනවිය පවසයි. කොළඹදී පැවති විශේෂ සමුළුවක් අමතමින් ඇය අවධාරණය කළේ, මෙම සේවාවන් මෙරට ආර්ථික ක්රියාවලියට විධිමත් ලෙස දායක කරගැනීම සඳහා ලෝක බැංකුව සහ ජාත්යන්තර කම්කරු සංවිධානය වැනි ආයතනවල තාක්ෂණික සහාය අත්යවශ්ය වන බවයි.විශේෂයෙන්ම මෙරට කාන්තාවන් නිවෙස් තුළ සිදුකරන දරුවන් සහ වැඩිහිටියන් රැකබලා ගැනීමේ කටයුතු මෙන්ම ගෘහණියන් ලෙස ඉටුකරන අප්රමාණ සේවය මෙතෙක් දළ දේශීය නිෂ්පාදිතයට (GDP) නිසි ලෙස ගණනය කර නොමැති බව අගමැතිනිය පෙන්වා දෙයි. මෙම “රැකවරණ ආර්ථිකය” හඳුනාගැනීම හරහා කාන්තාවන්ට ආර්ථිකය තුළ වඩාත් සක්රිය සහ පිළිගත් දායකත්වයක් ලබාදීමට හැකිවන අතර, ඒ සඳහා අවශ්ය ප්රතිපත්තිමය මඟපෙන්වීම් ජාත්යන්තර මට්ටමින් ලබා ගැනීමට රජය අපේක්ෂා කරයි.රජයේ නව ආර්ථික උපායමාර්ග තුළ මෙම ක්ෂේත්රයට ප්රමුඛතාවයක් ලබාදී ඇති අතර, මෙය හුදෙක් සමාජ සුභසාධන කටයුත්තක් පමණක් නොවන බව ඇය සඳහන් කළාය. රටේ ශ්රම බලකාය ශක්තිමත් කිරීමටත්, ආර්ථික අර්බුදයෙන් මිදී ස්ථාවරත්වයක් කරා යන ගමනේදී මෙවැනි සැඟවුණු ආර්ථික දායකත්වයන් ප්රධාන මිනුම්දණ්ඩක් කරගැනීමටත් රජය සූදානම් බව අග්රාමාත්යවරිය මෙහිදී වැඩිදුරටත් ප්රකාශ කළාය.
රැකවරණ ආර්ථිකය දළ දේශීය නිෂ්පාදිතයට: අගමැතිනියගෙන් නව යෝජනාවක්
